思古井 市井之徒

各位大家好，我叫思古井～本名梁烈銘。

思古井係一個正常人立埸既Youtuber，我由2021年嘅2月1號開始拍片，每日都會有一條評論當下時事嘅影片。呢個係我頻道嘅連結：https://www.youtube.com/channel/UCJ73m38GTd70IrT6ytTHJ2w

思古井的過去

我曾經係港安醫院護士學校嘅學生，不過當中發生左好多好黑暗嘅事，令我未能完成學業。至於相關嘅詳情，大家可以去HK01新聞連結流覽一下：https://www.hk01.com/article/82115?ut​​…

而某程度上因為呢一段經歷，經歷過社會黑暗面洗禮，曾經被強權壓迫，經歷不斷求助但求助無門嘅絕望境況，曾經向外求助而遭遇死亡恐嚇，令自身以及家人都面臨生命危險。

亦都因為曾經喺報章入面勇於去揭發部分港安醫院嘅黑事蹟，而導致剛好一個月後，就遭到網軍有系統性對我進行網絡欺淩，進行有專業抹黑，目的企圖蓋過港安醫院所曾做過嘅事。

所以當大家喺網上面嘗試去搜尋關於我嘅事，除咗會見到由今年所開始拍攝嘅時事影片之外，亦都會發現數年前我被一眾網軍抹黑帖子。而由於中間亦都發生咗好多好黑暗嘅事情，所以我都面臨住一種啞巴吃黃蓮有苦自己知嘅情況，即使係手頭上擁有能夠揭穿港安醫院黑幕文件，但暫時直到而家呢一刻依然未打算公開。或者喺未來某一日，網上突然出現有關資料，還原思南井以前所發生過嘅事，可以坦坦白白去同各位交代過去和所經歷過嘅一切。

過去的黑暗成為現在的原動力

市井之徒的誕生

因爲過往經歷體驗過社會眾多黑暗面：絕望、無助、被歧視、失去一切之經歷，所以係我自己力所能及情況之下，希望為社會受到不公平對待、受到黑暗面攻擊人和事盡力地盡力地去發聲。自從經歷過2019年嘅社會風波之後，令到我對正義二字有更加深刻嘅體會，正義並唔會從天而降、正義係需要由大家一齊去爭取，如果大家面對邪惡選擇退縮、逃避、怕麻煩… 只會助長壯大邪惡勢力，犯錯嘅人必須要承受懲罰。

雖然唔係每個人都有資格去執行正義，但係最起碼每個人都應該要為正義發聲，我過往就係體驗過沉默、冷漠、自私係一件幾恐怖嘅事，對一個人嘅傷害係可以好大甚至乎係冇辦法挽回，對於一個曾經被網絡欺淩既受害者，我希望喺自己有能力嘅時候就要儘自己所能地咆哮，希望自身可以成為一個榜樣，同時亦都唔希望世界上再有其他人經歷沉默、冷漠、自私，所以我都鼓勵睇到呢篇文嘅你，大家一齊圍住心中嘅正義而去發聲。

因為受到DJ嘅邀請，所以井仔我將會不定時係呢個網站撰寫文章，文章嘅題材係無特別限定，用自己呢一種口語化文字寫成文章，將自己嘅諗法透過文字紀錄落嚟向大家分享，不過由於我嘅文筆實在相當之差劣，希望各位觀眾能夠見諒。還請各位觀眾日後多多指教。如果有觀眾想聯絡我嘅話，歡迎各位隨時聯絡我。

＞End<